شاعر:نامعلوم
میرا روپ عاجزانہ نئیں
میرا عشق صوفیانہ نئیں۔۔۔
میں بلھا نئیں میں وارث نئیں
میں حبشی نئیں میں فارس نئیں۔۔۔
میرا ماہی میتھوں دور نئیں
میں تپیا وانگ تندور نئیں۔۔۔
میں کیتا کج نذرانہ نئیں
میرا عشق صوفیانہ نئیں۔۔۔
میں رومی نئیں میں جامی نئیں
میں پریت نبھانڑ دا حامی نئیں۔۔۔
میں کنگھرو بن کے نچیا نئیں
میں کنجری بن کے سجیا نئیں۔۔۔
میں گایا کوئی ترانہ نئیں
میرا عشق صوفیانہ نئیں۔۔۔
بس دلبر دلبر کردا ہاں
تے اوہدے عشق چہ مردا ہاں۔۔۔
اوہنوں ویکھ لواں تے حج میرا
اوہ سیج سنگھار تے سج میرا۔۔۔
کسے ھور دا میں پروانہ نئیں
میرا عشق صوفیانہ نئیں۔۔
0 comments: